ບົດກອນ ບາງຄັ້ງ ທີ່ຍັງຄິດ.

ບາງຄັ້ງ

ຮຽມນີ້ ຢາກທ່ວງຈຶ້ງ ດຶງຈ່ອງເວລາ

ສອງມື ຄົວໄປຫາ ນ່ວງນໍາກໍາໄວ້

ສຸມຈິດ ກັກກັນໃຫ້ ເວລາຢຸດແລ່ນ

ແສນຈະ ຍາກຍິ່ງລໍ້າ ກໍາແໜ້ນບໍ່ວາງ ແທ້ແລ້ວ

ບາງຄັ້ງ

ຮຽມນີ້ ຢາກໂດ່ງຂຶ້ນ ດຶງຈ່ອງເດືອນງາຍ

ໃຫ້ມັນ ກະຈາຍແສງ ຄໍ່າຄືນລົງພື້ນ

ນອນຫລັບ ມືນຕາຂຶ້ນ ເອົາເດືອນເປັນເພື່ອນ

ທຸກຄືນ ເດືອນສ່ອງແຈ້ງ ມອງໃຫ້ຊື່ນໃຈ ເຈົ້າເອີ້ຍ

ບາງຄັ້ງ

ຮຽມນີ້ ຢາກນ່ວງກັ້ນ ອົດປ່ອຍລົມຫາຍໃຈ

ຕັນໃນອົກ ເຊື່ອມໄປຕາມເນື້ອ

ໃຫ້ມັນ ເໜືອຈິດຕັ້ງ ນານປີສືບຕໍ່

ຂໍແຕ່ ໄພຫ່າງແລ້ວ ຫາຍໃຈຟື້ນຕໍ່ຄືນ

ບາງຄັ້ງ

ຮຽມນີ້ ຢາກເຄື່ອນຍ້າຍ ສັບປ່ຽນເວລາ

ສິ່ງດີ ເກີດກາຍມາ ຕ່າວຄືນຫັນປີ້ນ

ກັບໄປ ຕອນເຄີຍຫລິ້ນ ໄວເຍົາຍັງນຸ່ມ

ຍາມເມື່ອ ຊຸມພີ່ນ້ອງ ໂຮມໜ້າຮ່ວມກັນ ເຈົ້າເອີ້ຍ

ບາງຄັ້ງ

ຮຽມນີ້ ໃຈສົ່ງໃຫ້ ຕາເວັນຕໍ່າຕົກດິນ

ມືດມິດ ກັກກືນກິນ ໝູ່ໂພຍໄພຮ້າຍ

ຄວາມມືດ ກາຍໄປແລ້ວ ຕົກເຖິງວັນໃໝ່

ທຸກສິ່ງ ໃສສ່ອງແຈ້ງ ຄົນ ຫົວແຍ້ມໃສ່ກັນ

ແດ່ທ້ອນ

@ວິມາດອກບົວແກ້ວ