ບໍ່ຢາກໃຫ້ ເຊື້ອໂຄວິດ19 ເພີ້ມຄວາມຢ້ານກົວ ແລະ ທຳລາຍມູນເຊື້ອຄວາມຮັກແພງກັນຂອງຄົນລາວເຮົາ.
ເຫດການທີ່ໄດ້ເກີດຂຶ້ນ ເຮົາບໍ່ສາມາດ ປີ້ນຄືນໄດ້ແລ້ວ ແລະ ສະພາບການໃນທົ່ວໂລກ ມັນກໍມີອັນເກີດຂຶ້ນດັ່ງນີ້ເຊັ່ນກັນ ໃນຫລາຍຮູບແບບ ເຖິງວ່າ ບໍ່ມີໃຜຢາກຖືກຕິດເຊື້ອກໍຕາມ.
ຈະວ່າໃຜຖືກ ໃຜຜິດ ມັນແມ່ນໂທດກຳຂອງເຊື້ອໂຄວິດ ທີ່ເປັນຕົ້ນເຫດຂອງບັນຫາ ແຕ່ພວກເຮົາທຸກຄົນ ຕ້ອງໄດ້ເປັນເຈົ້າການເພີ້ມສະຕິສູງຂຶ້ນ ໃນການປ້ອງກັນໂຕເອງ ແລະ ປ້ອງກັນຜູ້ອື່ນໆ ຢ່າງເຄັ່ງຄັດ ແລະ ຕ້ອງໃຫ້ການຕັກເຕືອນກັນ ຮ່ວມມື ກັບເຈົ້າຫນ້າທີ່ ພະນັກງານປ້ອງກັນການແຜ່ເຊື້ອ ແລະ ແພດຫມໍ ທຳການກວດ ແລະ ຕ້ານເຊື້ອ ໃຫ້ໄດ້ຮັບຜົນດີທຸກຢ່າງ ບໍ່ໃຫ້ຄົນລາວເຮົາເຖິງຂັ້ນເສັຍຊີວິດ ດ້ວຍເຊື້ອໂຄວິດ19 ຖືວ່າຈະເປັນບຸນຄຸນ ອັນຫລົ້ນເຫລືອຂອງຄົນລາວເຮົາ ນັ້ນເອງ.
ໃນປະຈຸບັນເຫມືອນດັ່ງວ່າ ພວກເຮົາຕົກຢູ່ໃນສະພາບ ສົງຄາມສື່ສານ ການລະບາດການແຜ່ຂ່າວ ທີ່ເຫັນວ່າ ຈຳນວນຂ່າວຄາວຕ່າງໆ ໂດຍສະເພາະໃນເຟດບຸກ ໄດ້ທະລົ່ມຄົນເຮົາປານລູກລະເບີດ. ມີລູກແຕກເຮັດໃຫ້ຄົນຕາຍໃຈ ແລະ ມີລູກຕົກຄ້າງເຮັດໃຫ້ຄົນຊ້ຳໃຈ ເກີດມີຄວາມຢ້ານກົວສູງຂຶ້ນ. ຊຶ່ງທັງຫມົດ ແມ່ນເປັນອັນຕະລາຍ ຖ້າພວກເຮົາ ບໍ່ສາມາດລົບຊ້ອນການທະລົ່ມດັ່ງກ່າວໄດ້ໃຫ້ທັນການ.
ຂ່າວຕ່າງໆເຫລົ່ານັ້ນ ປະກອບໄປດ້ວຍຂ່າວດີ ແລະ ຂ່າວຮ້າຍ ທີ່ຜູ້ຄົນໃຈ້ແຍກໄດ້ຫຍາກ. ບາງຂ່າວ ກໍມີເລ້ລ່ຽມແອບແຝງຢູ່ເບື້ອງຫລັງ ຍົກແຕ່ບັນຫາ ມຸ້ງຫວັງສ້າງຄວາມປັ່ນປ່ວນ ຢາກສ້າງຊື່ສຽງ. ມີບາງຂ່າວຖືກຂຽນອອກ ແບບໄຮ້ສາລະ ຫລື ຂຽນຄວາມເຫັນອອກ ແບບບໍ່ຖືຕາມມູນຄວາມຈິງ ລໍ້ຫລອກເຮັດໃຫ້ຜູ້ອ່ານເກີດມີຄວາມເຂົ້າໃຈຜິດ ແລ້ວມີການວິຈານກັນເປັນຕ່ອງໂສ້ຕິດຕໍ່ກັນໄປ ປານໄຟໃຫມ້ທົ່ງຫຍ້າແຫ້ງ ນັ້ນເອງ.
ເຕັກໂນໂລຈີ ໃນການສື່ສານ ມັນທັນສະໄຫມຫລາຍ ສູງໄປກ່ວາ ຄວາມນຶກຄຶດຂອງຄົນເຮົາ ທັງໄຮ້ຂອບເຂດ.
ທຸກຄົນ ສາມາດຂຽນ ອອກຄວາມເຫັນ ມັນແຜ່ກະຈາຍໄປໄວ ໄປໄດ້ໄກກວ່າ ການແຜ່ເຊື້ອໂຄວິດ19 ຊ້ຳອີກ, ມັນເຂົ້າໄປທຸກບ່ອນ ເຖິງໃນເຮືອນໃນມຸ້ງ ໃນທົ່ງໄຮ່ທົ່ງນາ ຈອມພູຜ່າປ່າໄມ້ ບ່ອນທີ່ ໂຄວິດ ຍັງໄປບໍ່ເຖິງຊ້ຳ. ເຮັດໃຫ້ຄົນ ຕື່ນຂ່າວ ຢ້ານຂ່າວ ຮ້າຍແຮງກ່ວາ ເຊື້ອໂຄວິດ ອີກດ້ວຍ.
ດັ່ງນັ້ນ ຈຶ່ງເວົ້າໄດ້ວ່າ ການແຜ່ລະບາດຂ່າວອະກຸສົນ ກໍເປັນອັນຕະລາຍ ບໍ່ຕ່ຳກ່ວາ ການແຜ່ລະບາດເຊື້ອ ໂຄວິດ19 ນັ້ນເອງ ຄື ດັ່ງທີ່ເກີດຂຶ້ນໃນປະຈຸບັນ ໃນລາວເຮົາ.
ເພື່ອການປ້ອງກັນ ແລະ ຫລຸດຜ່ອນຄວາມຢ້ານ ຜູ້ຊົມໃຊ້ຂ່າວ
– ຕ້ອງເລືອກເຝັ້ນ ແຫລ່ງຂ່າວທີ່ຫນ້າເຊື່ອຖືໄດ້ ຄືແລງຂ່າວຂອງລັດ
– ຕ້ອງຊອກຮູ້ຊອກຖາມ ໃຫ້ສາມາດເຂົ້າໃຈໄດ້ ເຖິງຄວາມເປັນອັນຕະລາຍຂອງເຊື້ອໂຄວິດ
– ວ່າມັນຈະສາມາດມາຕິດຕໍ່ໃສ່ໂຕເອງໄດ້ແນວໃດ ຢູ່ໃສ ແລະ
– ຈະສາມາດປ້ອງກັນໂຕເອງ ແລະ ຄົນໃນຄອບຄົວ ໄດ້ຄືແນວໃດ?
ເມື່ອຮູ້ຈັກ ດັ່ງທີ່ກ່າວມາເທິງນັ້ນແລ້ວ ທາງທີ່ດີ ຄວນຫລຸດຜ່ອນການຊອກອ່ານຂ່າວໃນເຟດບຸກໃຫ້ຫນ້ອຍລົງ.
ພວກເຮົາຄວນຫລຸດຜ່ອນອາລົມ ແລະ ທ່າທີຂອງຕົນ ໃຫ້ຖືກຕ້ອງ ເຖິງວ່າຈະເປັນຄວາມເປັນຮ່ວງອັນສູງສົ່ງ ຕໍ່ຊາດກໍຕາມ ແຕ່ ຄວນມອບໃຫ້ ທາງການເພິ່ນ ເປັນເຈົ້າການໃນການແກ້ໄຂບັນຫາທີ່ເກີດຂຶ້ນ ໄປຕາມຂັ້ນຕອນລະບຽບກົດຫມາຍຂອງມັນ ເພື່ອຮັກສາບັນຍາກາດອັນດີ ແລະ ຄວາມສາມັກຄີຮັກແພງຂອງຄົນລາວເຮົາ ເຖິງວ່າຈະຕົກຢູ່ໃນສະພາບໃດກໍຕາມ.