ເວົ້າສູ່ກັນຟັງ ກ່ຽວກັບ ພັນລະຍາ ແລະ ສາມີ.
ໄດ້ອ່ານບົດນຶ່ງ ຈາກຫນັງສືພີມ ແມ່ຍິງສາກົນ ທີ່ ເວົ້າເຖິງ ບົດບາດຄວາມສຳຄັນ ຂອງແມ່ຍິງ ທີ່ມີຄວາມສາມາດ ຊ່ວຍຊູ ຍູ້ຫນູນ ຄອບຄົວໃນຫລາຍຮູບຫລາຍແບບ ເປັນຕົ້ນຊ່ວຍ ສາມີ ໃຫ້ກາຍເປັນດັບເປັນດີ ແຕ່ ເຮັດໃຫ້ສາຍຕາຂອງສັງຄົມ ມອງຂ້າມ ຜູ້ຄົນທີ່ຊ່ວຍຊູຍູ້ຫນູນ ຢູ່ເບື້ອງຫລັງ ດັ່ງບົດເລົ່າເລື້ອງດັ່ງຕໍ່ລົງໄປນີ້ ພາໃຫ້ຄົ້ນຄິດ ເຖິງແມ່ຍິງ ເຖິງຜູ້ເປັນແມ່ ໃນລາວເຮົາ ທີ່ມີບຸນຄຸນອັນຫລົ້ນເຫລືອ ຕໍ່ຄອບຄົວ ຕໍ່ຜູ້ເປັນຜູ້ຊາຍ ຫລື ເປັນສາມີ ທີ່ບໍ່ຄວນເບິ່ງຂ້າມ.
ເຄີຍມີການເລົ່າເລື້ອງ (ແບບ Humor ຕະຫລົກ ຂອງຊາວຕາເວັນຕົກ ບໍ່ແມ່ນການໃສ່ຮ້າຍປ້າຍສີກັນ) ກ່ຽວກັບ ອາດີດນາຍົກລັດທະມົນຕີອັງກິດ ທ່ານ ເຈີຈີນ Sir Winston Churchill (ຊຸດ 1951 -1955) ເລົ່າວ່າ ທ່ານກັບເມັຍ ໄດ້ພາກັນໄປຍ່າງທ່ຽວໃນສວນແຫ່ງນຶ່ງ.
ພໍກາຍໄປຕາມທາງຍ່າງ ມີຊາຍຄົນນຶ່ງ ກຳລັງກວດທາງຍ່າງຢູ່. ພັນລະຍາຂອງທ່ານ ໄດ້ຍ່າງເຂົ້າໄປຫາ ໂດຍທີ່ປະໃຫ້ ທ່ານ ເຈີຈີນ ສືບຕໍ່ຍ່າງໄປຜູ້ດຽວ.
ດົນສົມຄວນ ພັນລະຍາ ຈຶ່ງຍ່າງໄປຫາ ທ່ານ ເຈີຈີນ ທີ່ຖ້າຢູ. ພໍໄປເຖິງ ທ່ານ ເຈີຈີນ ໄດ້ຖາມພັນລະຍາວ່າ ´“ເປັນຫຍັງ ຄືລົມກັບ ຄົນກວດທາງ ດົນແທ້?“
ພັນລະຍາຂອງທ່ານ ຕອບວ່າ „ແມ່ນຄົນຮູ້ຈັກກັນ ໃນຕອນຮຽນຢູ່ມັດທະຍົມ“.
ຈາກນັ້ນ ທ່ານ ເຈີຈີນ ກໍເວົ້າແບບຍິ້ມເປີ້ຍວ່າ „ທີ່ຮັກ ນ້ອງເກືອບໄດ້ຜົວເປັນຄົນກວດທາງນໍ.“
ພັນລະຍາ ຂອງທ່ານ ກໍຫົວຍິ້ມເປີ້ຍຄືນ ແລ້ວຕອບວ່າ „ຖ້ານ້ອງໄດ້ກັບລາວ ປານນີ້ເຂົາອາດໄດ້ກາຍເປັນ ລັດທະມົນຕີ ແລະ ອ້າຍ ອາດໄດ້ເປັນ ຄົນກວດທາງ ໄປແລ້ວແນ່ນອນ“.
ເນື້ອໃນຂອງບົດເລື້ອງນີ້ ທາງຫນັງສືພິມແມ່ຍິງ ຢາກເນັ້ນໃຫ້ເຫັນວ່າ ຜູ້ຊາຍ ທີ່ມີອິດທິພົນຊື່ສຽງ ອັນດົງດັງ ແມ່ນມີພະລັງແຮງ ຍູ້ຫນູນຢູ່ເບື້ອງຫລັງ ຈຶ່ງເປັນໄປໄດ້ ນັ້ນກໍຄືຄອບຄົວ ໂດຍສະເພາະແມ່ນ ເພດຍິງ ຜູ້ເປັນແມ່ ຜູ້ເປັນພັນລະຍາ ນັ້ນເອງ.
@ວິມາລາວດອກບົວແກ້ວ